అనువాదకుని గురించి
జననం, 1949 జూన్ 26న. పశ్చిమ గోదావరి, పాలకొల్లు పక్క పల్లెటూరులో. పెరిగింది సఖినేటిపల్లిలో. 1966-71 లో ఆంధ్రా యూనివర్సిటీ, విశాఖపట్నం నుండి ఎలక్ట్రికల్ ఇంజినీరింగ్ పట్టభద్రత. ఆ టైమ్ లోనే, వివేకానంద, గాంధీ, శరత్ చంద్ర, ఠాగోర్, ప్రేమ్ చంద్, గోపీచంద్, చలం, బుచ్చిబాబు, రావిశాస్త్రి, కార్ల్ మార్క్స్, శ్రీశ్రీ మొదలైన వారి పుస్తకాలు చదివడం జరిగింది. చుట్టూ కనపడే దారిద్ర్యం, అన్యాయం, అవినీతి, మతపర మూఢ నమ్మకాలూ మనసును కలచి వేసాయ్. ఏదో రాయాలనే కోరిక కొన్ని కథలతో ఆగింది. అక్కడే జరిగింది, మతపర నమ్మకాలనుండీ, ఛాందస సంప్రదాయ సంస్కృతుల నుండీ అంధ విశ్వాసాల నుండీ,శాశ్వత విముక్తి. కాకినాడ JNTU లో M.Tech. చదువుతుండగా మధ్యలో BHEL ఉద్యోగంలో జేరడం తరవాత. 2003 లో BHEL నుండి స్వచ్ఛంద ఉద్యోగ విరమణ.
తత్వశాస్త్రం(ఫిలాసఫీ)లో నాకున్న అభిలాష, వేదోపనిషత్తులూ, భౌద్ధం, బైబిలు, ఖురాన్, పతంజలి, రజనీష్, మహేష్ యోగి మొదలైన, ముఖ్యంగా జిడ్డు కృష్ణమూర్తి గారి పుస్తకాలూ చదివించింది. దేవుడే కాదు, ఆత్మ, మనసు, time, free-will అనబడేవేవీ కూడా అసలు లేనేలేవని నిర్ధారణ అయింది. నాలోని శేష ప్రశ్నలకు జవాబులు యింకా వెతుకుతుండగా, జూన్ 2015 లో, జిడ్డు కృష్ణమూర్తి గ్రూపు లోని ఒక మిత్రుని ద్వారా యు.జి. కృష్ణమూర్తిగారిని గురించి వినడం, వెంటనే యూజీ పుస్తకాలు చదవడం జరిగింది. యూజీ మాటల్లో ఏదో తెలియని కొత్తదనం కనిపించి, ముఖ్యమైన యూ‌జీ పుస్తకాలలో ఒకటైన The Mystique of Enlightenment అనే పుస్తకాన్నీ మరియూ “About UG” అనే వ్యాస సంపుటినీ, ‘జ్ఞానోదయ రహస్యం’ & “యూజీ గురించి” అనే శీర్షికలతో, తెలుగు చేయడం జరిగింది.” ఆ వరసలో యీ ‘Mind is Myth’ పుస్తక అనువాదం మూడవది. “మానసికమైనదంటూ ఏదీలేదు, ఉన్నదంతా భౌతికమైనదే’ అంటాడు యుజీ.

జె. యస్. సుబ్రహ్మణ్యం, హైదరాబాద్
josyulass4@yahoo.com, 9440724540